財爺鬍鬚曾早前喺新一份預算案，話七年後會出現結構性財赤，所以要開源節流，但一開口就備受批評，鬧爆佢講嘢靠嚇。唔知係咪咁，所以佢尋日就特登喺網誌提到今日長遠財政計劃工作小組會舉行記者會，講解小組報告內容，實行推個波畀小組搞掂佢。

設計圖片及對白

鬍鬚曾早前引述長遠財政計劃工作小組數據，預警香港受人口老化問題及勞動人口下降影響，如果政府開支比例持續大過收入嘅話，最快七年後就會有結構性赤字，令庫房轉盈為虧，跟住佢又推翻自己所講嘅，話預警係好嘅，但政府唔會畀佢發生，又再暴露佢「狼來了」嘅伎倆。跟住佢又話會設法阻止呢件事，建立「未來基金」儲起部分盈餘，留日後入不敷支時用云云。

不過，佢早排先話認同政府未來會繼續增加支出，唔使少啲，咁即係點呢？相信佢講完都知太矛盾冇人信，所以尋日就喺網誌度表示留意到市民對小組結論有疑惑，所以長遠財政計劃工作小組今日下午會開記者會，同大家分析報告數據內容，到時相信可以令有質疑嘅人修訂睇法。老實講，佢一直都係引述小組嘅報告嚟講，但講極都冇人信，依家仲要將個波推畀小組去幫佢解畫，掂唔掂o架？

第一手消息請下載on.cc東網iPhone/iPad/Android/Windows Phone Apps