政壇：乖孫精靈李張慧美笑晒
保良局前主席李張慧美再抱孫，孫女Emma李嘉穎趕及喺農曆年前出世，親友利是如雪花般飛至。B女嘅爸爸Eric李世傑話會將逾萬元嘅利是錢儲起，留待囡囡長大讀書用。
孫女Emma精靈又乖巧，李張慧美笑言係最好的新年禮物！（被訪者提供）
出世六磅六安士嘅Emma，鼻子高高，似足嫲嫲。李太喺個孫女出世後，隔日就去睇佢，作為嫲嫲，當然甜到漏。講到改名，Eric坦言曾請教高人，夾過八字後敲定嘉穎呢個名。首次入產房迎接新生命，Eric親手剪臍帶，估唔到一剪就掂，囡囡嘅額形最似佢喎！Emma好乖巧，夜晚好少喊，非常易湊。Eric直言湊女經驗唔多，全靠陪月「過招」，幸好三扒兩撥已學識餵奶同換片。Emma胃口極佳，每日食七次奶，體重快速增磅，好精靈。
有女萬事足，Eric話會再追多幾個，但唔急於三年抱兩，心願係生夠兩至三個小朋友，事關大家族，開心啲喎！
