政壇：潘兆平爭取開議員診所
話時話，立法會議員除咗每月有八萬七千四百零蚊酬金外，每年另加享有三萬幾蚊醫療津貼，比起一般打工仔算唔錯。但勞聯嘅議員「潘少」潘兆平日前出席勞工界甲午年新春酒會，就代表其他同僚出頭，話希望立法會附近可以開番間議員診所，等佢哋一有頭暈唔舒服就可以去左近睇醫生，唔使因為要去中環或灣仔睇醫生而開唔到會喎！
潘兆平心繫勞工權益，要幫其他同事爭取喺立法會附近開議員診所。（資料圖片）
潘少話自農曆新年後就覺得有啲唔舒服，之後又要畀忽冷忽熱嘅天氣搞到患感冒，病足幾個星期都仲未好番。立法會早排審議「雙辣招」印花稅條例草案期間，佢原本諗住偷偷哋搵個時間「蛇」出去睇醫生，但由於部分議員不時響鐘要求點算法定人數，或者要坐定定留喺議事廳入面等投票，搞到佢唔可以偷走。再加上立法會喺嗰幾日開會開足十三個鐘，開得完會醫生都收晒工，終於令佢拖足幾日都無法睇醫生。
咁不如喺立法會內設立診所啦，方便一次過收集議員嘅病歷，醫生又可以開瀉藥畀立場唔啱聽嘅議員集體服用添！
