「俊華，守穩啲！」鬍鬚曾片刻未忘師父嘅教誨。記起當日大意「中蛋」，實在丟架，猶幸今次預算案將庫房守得穩如鐵桶、滴水不漏，先不至有辱師門。成功挽回面子，鬍鬚曾決定去茶餐廳，飲番杯中產最愛嘅咖啡賀一賀佢。

鬍鬚曾落完單，赫然發覺炳炳局長喺隔籬枱，但就企喺度冇櫈坐，鬍鬚曾大惑不解︰「炳炳局長因乜解究棟喺度？」炳炳局長未及回應，伙記已搶先代答︰「因為我哋太好生意，於是咪抄局長條橋，收咁啲櫈畀多啲客入嚟囉！」炳炳局長自食其果，惟有默然低頭、強忍淚水。

鬍鬚曾努力忍笑嗰陣，咖啡亦送到。為免重蹈覆轍，鬍鬚曾就問伙記︰「有無落糖？」「放心，包無減甜。」鬍鬚曾聽完安心晒，點知一拎起杯咖啡，發覺只得一半，於是又問︰「點解得半杯？」伙記笑住答︰「我預計我哋下年會有結構性財赤，為咗唔畀佢發生，所以咖啡減半慳成本，明未？」鬍鬚曾一聽，當堂激到暈低。

第一手消息請下載on.cc東網iPhone/iPad/Android/Windows Phone Apps