SUN奇古怪：SUN潮語：【豬隊友】
一般而言，話人「豬」嘅意思，就係指一啲無知而又欠缺思考力，愚蠢而容易受騙嘅人。「豬隊友」不設年齡限制，由八歲到八十歲都可以係，「豬隊友」外表可能略帶肥胖，看來有點像「豬」，樣貌帶一點蠢，還經常發表一些笨言論，做笨拙的事。因為一般相信豬隻智商較低，所以可能被人搞咗都懵然不知，以至後來有呢個潮語出現嚟形容那些無知蠢貨。
網上流行一句潮句，通常喺打機或者要一隊人先至可以完成工作嘅時候用。呢句就係：「唔怕神一樣嘅對手，只怕豬一樣嘅隊友。」大概意思係話，唔怕對手強，只怕有好似豬咁蠢嘅隊友拖累全隊。
呢個情形當然唔止係打機嘅時候出現，就算喺工作嘅時候，一個團隊總有一兩個專累街坊嘅人。又好似睇政府或立法會嘅建制派團隊，總有啲人係少說話大幫忙，將啲事愈描愈黑。最近香港正值風風雨雨，有報章前總編被斬至重傷，黑勢力無法無天之際，竟然有人喺網上發表偉論，大唱反調。隨即惹來網民大肆批評，甚至有影星及電影導演加入罵戰，隔空開火人身攻擊為「豬隊友」！查實任何人也有言論自由，有權發表自己嘅意見，網民又唔使太過激動。
有科研報告證實咗豬其實並唔係大家想像中咁蠢，只不過外表生成可愛又易呃，所以大家覺得佢係「豬隊友」。其實如果大家仲係唔明「豬隊友」係點嘅樣？可以開電視睇新聞，你會發現好似「豬隊友」咁嘅人，立法會大把。
