俗語雖有云聲音兩邊走，但真係咁都好頭痛。好似鄉事派組黨一事，鄉議局副主席林偉強踴躍發言，另一邊廂主席劉皇發又冷處理，前日佢哋去深圳搞集思會，據聞會上並唔係主要傾組黨，而係叫林偉強出少句聲，發叔曾斬釘截鐵話林偉強「胡說八道」，講嘅嘢唔算數，唔代表鄉議局，而其他成員更索性叫林偉強收聲。即係話，林偉強要收聲，發叔就成為組黨嘅唯一發言人。

設計圖片及對白

發叔、副主席張學明、林偉強同各鄉事委員會主席及顧問等約四十幾人前日中午出發去深圳，尋日下晝返港，集思會傾啲乜大家都好關注，但據講會上主要講點樣鞏固票源，譬如由下年舉行嘅村代表選舉作為起點，做好選民登記。發叔回應時就話，集思會主要真係傾吓大浪西灣，同不包括土地被納入郊野公園範圍嘅事應該點樣處理，至於組黨，發叔就話組黨需要人力、財力同物力，鄉議局依家好哋哋，唔使執意搞咩組黨嘅。

不過，會上其實都有提到呢件事，有成員認為難以成事，就話總之支持發叔嘅決定。亦有部分成員投訴，嗰啲曾經受過鄉紳恩惠、被協助抬轎嘅立法會議員，喺新界人有事時唔幫佢哋出句聲喎！

第一手消息請下載on.cc東網iPhone/iPad/Android/Windows Phone Apps