最近同泛民主派愈走愈埋嘅富貴黨，早前就香港公立醫院醫生不足問題同白鴿黨合作，令人認為該黨決心轉型做反對派。前晚另一泛民政黨工黨舉行成立兩周年籌款晚會，富貴黨黨魁田北俊繼續有動作，異常慷慨咁捐出一支名酒畀工黨拍賣籌款，底價八千蚊，最後由同工黨友好嘅空中服務員工會以一萬蚊投得。

工黨形象一向草根，又支持標準工時立法及反對輸入外勞，同自稱代表工商界及中產嘅富貴黨，喺各方面都係格格不入，但田少仍然幫對方籌款，睇嚟佢哋已經一家親嘞！

除咗拍賣，工黨議員張超雄同李卓人又喺晚會上即場彈結他同獻唱籌款，其中張超雄彈結他尚算合格，但阿人嘅歌喉就比得上「嶽曲」，最後有人玩嘢捐出五百蚊，要求阿人自行「滅聲」，以免影響賓客食欲，認真瘀爆！

成個晚會最後即場籌到十六萬，都算係咁喇。

第一手消息請下載on.cc東網iPhone/iPad/Android/Windows Phone Apps