李運強講起內地航班成日受空管延誤，就非常谷氣。
內地郁啲就進行空中管制（空管），本報踢爆一年竟然有四百幾次空管，即係每日多過一次，搞到港澳同深圳飛機航班經常亂晒龍。尋日馬場有大批名人，同香港鐘表業總會前主席梁青華、理文造紙創辦人李運強及博愛醫院前總理王嘉恩（Albert）講起呢個話題，原來個個都有慘痛經歷，梁青華仲話行家之間有個笑話，話內地班機延誤係正常，準時先至係意外喎，認真諷刺。
王嘉恩（左）搭內地航班必定帶備充足小食。右為王太。
梁青華（右）話內地航班經常失準，梁太（左）笑言已經慣咗。
華哥話，印象中幾乎次次搭內地航機都會延誤，試過有一次由海口搭下午兩點機返港，竟然延遲至翌日凌晨一點幾先至起飛。佢話，據聞由香港至廈門高鐵車程只需六個鐘，咁佢就寧願搭高鐵好過嘞！
李運強一講起內地班機延誤就好谷氣，仲話幾十年嚟都冇改善。咁佢有冇試過因此錯過商機，損失慘重？佢就話損失金錢事小，引起民怨事大。話時話，航班若嚴重延誤有得申請旅遊保險賠償喎，但李運強冇咁好氣，話班機延誤已經嬲到爆，仲邊記得申索保險吖！Albert就話，內地航空公司唔會特別照顧乘客，通常乘客一知道延遲起飛就一窩蜂搶購小食，所以佢必定帶好多零食做準備。
第一手消息請下載on.cc東網
