政壇：陳甘美華受託爭婦權
踏入三月，婦女節又至，香港婦聯尋日率先出招，要求同為女性嘅民政事務總署署長陳甘美華為婦女爭取吓權益，佢哋關注嘅係，現時《區議會條例》規定如果區議員未取得區議會同意而連續四個月冇開會，就會喪失區議員資格，本來係防止議員長期「蛇王」，但原來女議員因懷孕或產子缺席會議都冇得豁免，婦聯質疑呢個安排對女性議員不公，所以去信陳甘美華，要求修例容許女性議員因為懷孕或產子缺席會議，確保佢哋唔會因為生仔冇咗個議席。婦聯同時又建議區議會容許男議員申請侍產假，避免影響家庭和諧喎。
設計圖片及對白
同時爭取男士侍產假
雖然以往從來未有議員因為生仔請假而被剝奪議席，但婦聯都要求當局重新檢視，仲成功爭取咗十八區區議會共一百八十三個區議員簽名支持，一併交畀陳甘美華，希望喺《區議會條例》加入「家庭友善政策」元素。女性區議員面臨嘅問題一直未受關注，今屆區議會中，有唔少區議員做咗媽咪，例如有「工聯會小花」之稱嘅元朗區區議員劉桂容，佢喺上任之後大肚，去年七月就生咗個囝囝，佢老公就係荃灣區區議員葛兆源。至於中西區區議員蕭嘉怡亦喺去年八月榮升靚媽，佢嘅黨友、深水埗區議員劉佩玉亦同樣喺今屆任期內做咗媽咪，呢啲媽咪議員嘅權利真係值得大家關注吓o架！
雖然婦聯為女性發聲，但尋日封信都有照顧埋男性，提到區議會條例冇畀男士有侍產假，仲話以前有男議員申請陪老婆做產後檢查都唔批准，雖然依家只有政府部門先至享有侍產假，但婦聯就認為呢種不平等嘅待遇對區議員唔公平，影響家庭和諧。
