SUN搞作：少膽虫手記：事業線
淫賤黎今日唔知食咗咩藥，突然興起巡視員工的表現，喺公司走上走落，擺出腦細高姿態，搞到人心惶惶。
坐喺位嘅少膽虫當然好勤力，單手揸滑鼠，左手喺枱底唔知搞緊乜。喺淫賤黎眼中，少膽虫在拚命賣力，「虫！你冇令我失望，果然最做得嘢嘅喺你！」聽到腦細把聲，嚇得少膽虫流了額汗、閃閃縮縮，「梗……梗……梗係啦！虫唔會偷懶！」
原來少膽虫左手收埋咗部平板電腦，淫賤黎不禁問道：「忙緊乜呀？」「睇業績囉，哇，條線又長又深，唔思前想後都唔得呀！」勢估唔到少膽虫睇緊跌到落谷底盤數，淫賤黎當然感動不已，一手搶走部平板，諗住讚揚少膽虫，點知唔搶由自可，一搶就見到部機show住幾件性感尤物，通通着住三點式泳衣、低胸貼身裙，可謂美艷火辣，「又話睇業績？點解全部艷照嚟？」
少膽虫招積咁話：「『事業線』嘛，仲唔係業績？」「你條虫！同鐵頭仁返工睇艷照有乜分別！」「梗係唔同啦！人工都唔一樣，人哋月逗八萬蚊呀！」
