潮語「洗版」嘅「版」字,其實係版面咁解。呢啲版面就係大家手機或電腦上社交媒體,例如係facebook或討論區嘅版面,被同一件事充斥。人人都爭相分享或評論同一件事,導致出現「洗版」嘅情況,亦都證明一啲事件受到廣泛關注。

早幾日發生咗兩件事,旋即成為全城熱話,無論網上及主流媒體都大幅報道。一件係《明報》前總編輯劉進圖,日光日白喺西灣河被人斬至重傷,一度情況危殆,經醫生搶救後,現在暫時無生命危險。呢次事件惹嚟好多猜測,好多人覺得呢單嘢同香港嘅新聞及言論自由有關,更推想到係有人希望殺一儆百,要恐嚇香港傳媒,要大家乖乖哋唔好咁多嘢講。但觀乎刀手嘅行事手法,係似想攞命多於威嚇,所以有另外一個說法,係劉氏掌握太多國家級機密,包括好多國家領導人嘅財產資料,以至惹禍上身。正當劉進圖捱斬,處於生死邊緣之時,另一位仁兄喺立法會,竟然喺財爺Present緊份預算案期間,被人偷影到佢透過平板電腦上網睇鹹相,呢個就係民主黨嘅何俊仁!大家都係男人,睇鹹相絕對唔係問題,但喺立法會開工期間睇就真係罪無可恕!靠佢爭取民主搞咗二十年得個吉,最後仲要跪低埋,依家正正經經開會都做唔到,仲話超級區議員?超級廢議員就有佢份!呢兩單嘢,同日發生,一件傷心,一件惡心,相信當日唔少人嘅facebook都被呢兩件事「洗版」!

呢個「洗版」就唔同「洗板」,「洗板」係舊時用嚟洗衫嗰塊板,雖然依家依然有人用緊,但係對好多90後嚟講,洗衫板絕對係香港博物館嘅展品,亦係上一代用嚟形容平胸女子嘅代名詞。

每逢有大事發生,無論係天災海嘯地震,或名人去世,都會出現「洗版」。有時,一班人集體喺某個人的版面上不斷留言,亦會達到被「洗版」嘅效果,例如要集體鬧爆一個人,好多網民都會群起「洗版」攻擊。

今時今日,香港仲係法治之區,並且享有言論自由。但係近年,隨住中港進一步融合,加上傳媒自我審查日益嚴重,難保有一日連「洗版」嘅自由都無,每日就被國家如何偉大,領導人如何英明等樣辦資訊「洗版」,到時唔止版要洗,你同我個腦都要洗一洗。

第一手消息請下載on.cc東網iPhone/iPad/Android/Windows Phone Apps