近排先後傳出區議會席位出缺需要補選，繼今個月下旬舉行嘅南區海怡西補選外，下月就輪到離島區東涌北選區補選喇。東涌北選區補選戰之中，據聞除咗半年前開始落區嘅泛民主派年輕大狀余俊翔積極考慮參選外，建制派方面可能會派服務過離島區嘅前委任區議員、香港資助小學校長會主席梁兆棠鬥過。不過，呢區雖然本屬建制派陣地，但今次連建制中人都有啲憂慮。

今次嘅補選係因為原東涌北區議員林悅偽造文件，向銀行申請按揭貸款，被判入獄二十一個月，緩刑兩年，再被區議會按《區議會條例》取消議員資格，所以議席需要補選。有建制中人就話，擔心事件影響建制派嘅形象，尤其係當區居民唔知點睇，再加上東涌北區中產人士較多，加上梁兆棠又未曾參選，所以預料雙方最多都係五五波咋。至於中途仲會唔會有其他人士加入戰團？到依家都未知，話唔定有人冷手執個熱煎堆。

第一手消息請下載on.cc東網iPhone/iPad/Android/Windows Phone Apps