政壇：建制泛民就公民提名鬥法
政改諮詢期剩低兩個多月，港府官員雖然再三呼籲各界唔好繼續虛耗時間喺公民提名上，但泛民主派卻話之你，部分人堅持有「公民提名」嘅普選先算係真普選，據聞建制同泛民會喺餘下諮詢期就公民提名大鬥法，橋段同招數都大把。
就好似有人搞佔中，建制派喺去年中陸續發起「反佔中」嘅輿論戰，全港十八區區議會相繼有議員提出反佔中動議。據聞佢哋近日計劃第二波行動，就係動議「反對公民提名」喇。繼北區、油尖旺及元朗等區議會有議員呼籲社會支持普選方案，要符合《基本法》同全國人大常委會決定基礎嘅動議後，離島及觀塘等其餘區議會將有議員提出相關動議。
建制圍攻，泛民都有招，有黨派高層最近就密謀喺北京開人大及政協兩會嘅兩個星期中，喺香港搞個集體絕食行動。呢個計劃暫時仲係非常機密，究竟點搞、喺邊度搞，又會唔會一邊佔中一邊絕食等都冇人知，淨係知道唔係一、兩個人參加嘅事，而參加者仲係大家都意想不到嘅人物喎，撲朔迷離。
