由立法會議員林大輝創立嘅林大輝中學創校十周年,尋日舉行周年慶典,大輝請咗特首梁振英(CY)主禮,其中一個環節係放置時間囊,十年後再攞出來,當住CY面前,大輝將放咗前政務司司長唐英年等嘉賓出席該校奠基禮時嘅照片入時間囊,唔通真係時移世易,好朋友都要擺埋一邊,放落時間囊?

林大輝(左三)手執當年該校奠基時同唐英年嘅合照,當住梁振英(左四)面前放入時間囊。

CY抵達學校時,大輝親自迎接,兩人又熱情握手,唔知嘅都好難想像佢哋喺特首選舉時係敵對陣營。擺放時間囊時,內有物件包括當年申請辦學嘅計劃書、創校時嘅學生名單、學校奠基禮及尋日慶典嘅照片等,CY就放咗尋日寫畀該學校嘅紀念卡,佢仲話希望十年後可以返學校同大家一齊見證時間囊出土。

今次請CY主禮,大家都問大輝係咪「破冰」,大輝矢口否認,話教育無分陣營、黨派同政治,係人人有責,佢只係想請特區政府最高領導人來見證學校重要一刻。至於十年後會否再請CY出席學校二十周年慶典,佢就話︰「到時梗係希望請當時嘅特首啦!」

第一手消息請下載on.cc東網iPhone/iPad/Android/Windows Phone Apps