政壇：議員圍攻Phone狂的士
智能手機普及改變咗好多傳統操作，的士業就被揭有司機於行車時操控多部觸控式智能電話，藉此接客，呢種Phone狂行為令市民同立法會議員都好驚，尋日立法會交通事務委員會討論呢個問題時，好多議員都要求政府盡快立法規管，但運輸及房屋局副局長邱誠武回應時卻認為要先搜集數據及研究，啲議員一聽就火滾，紛紛開腔鬧佢慢吞吞嘅態度，甚至有建制派議員譏諷佢做官有專人專車服侍，不知民間疾苦。
設計圖片及對白
Phone狂的士被踢爆後，傳媒唔止一次影到有司機車頭擺咗四至六部電話，有的士更誇張到擺放超過十部電話，由於現行條例只係針對駕駛者手持電話傾偈，冇規管手撥或按屏幕等同樣使用電話行為，更加冇規管車頭擺放電話嘅數量，所以啲議員都話太危險，要求政府盡快做嘢，但係邱武就話，立法工作之前，當局需要多啲數據及研究，譬如佢哋已要求警方喺有人受傷嘅交通意外中，紀錄涉事車輛智能電話嘅數目等，總之就係要等喇。
樹根指摘專人專車服侍
人民力量嘅陳偉業一聽就好不滿，鬧佢罔顧危險，也有議員鬧佢「唔死人唔做嘢」，建仔嘅鍾樹根就指摘政府官員有專人專車服侍，揶揄佢哋唔使坐的士，仲建議佢「試下叫司機喺車放四部電話，一路行、一路按，你覺唔覺得安全？」議員爭相開火，大鬧當局對Phone狂現象唔着緊，最後要求當局半年內交出警方收集的數據結果，而委員會尋日都一致通過無約束力動議，促請當局研究問題嘅危險性，並立法禁止乘客議價以打擊「八折的士黨」，減少司機行車時操控智能電話嘅動機。
