人命分貴賤 傳媒有親疏

一名讀中學時曾獲推薦好學生嘉獎、現時就讀香港專業教育學院嘅十九歲男生，疑因不堪功課壓力患上情緒病，三日前前往大埔那打素醫院求醫，惟需排期到明年初至能夠求診，即係差唔多要等足一年。喺絕望之下，男生尋日趁家人外出嘅時候，喺大埔住所一躍而下，當場喪命。死者母親返完夜班回家驚聞噩耗，情緒崩潰，怒轟院方未有即時跟進兒子病況，終於搞出人命，矢言要追究到底。

唉，因為醫管局無良，咁就害死一個後生仔，簡直係草菅人命。正如死者母親控訴，長期患有抑鬱徵狀嘅兒子去醫院求診，評估完連藥丸都冇一粒畀佢食，排期又要一年之後至有得睇，院方根本唔當病人係病人，點可能唔搞出人命吖。試諗吓，如果求診者唔係普通市民，而係官僚權貴，院方會唔會叫佢等一年吖？

事實證明，人命真係有貴賤o架。《明報》前總編輯劉進圖被斬傷，高官同政客爭先恐後趕赴醫院抽水，又探望，又慰問，又譴責兇徒。反觀呢位男生間接畀醫管局害死，有冇人去探望過死者家人吖？有冇人表示關懷慰問吖？有冇人出來譴責醫管局吖？喺高官同政客眼中，有人嘅命貴重，有人嘅命係草芥，呢啲唔係親疏有別又係乜吖？

講到親疏有別，何止人命分貴賤，對待傳媒嘅態度更加係天淵之別吖。好似《明報》總編輯換人、商業電台節目主持人被炒，都畀人上綱上線，講成打壓新聞自由，有人遊行抗議，有人發起組織聲援，有人要求立法會跟進，搞到滿城風雨。但係正義傳媒不畏強權，屢次揭露港府施政亂象，踢爆社會種種黑暗，反而成為官僚同其他邪惡勢力嘅眼中釘肉中刺，咁多年嚟不斷遭到滋擾同打壓，消防處、警務處、衞生署、食環署、影視處、淫審處、私隱公署、平機會等部門輪流上陣，有啲罪名千奇百怪到你唔信，又有邊個出過聲吖？

事實證明，打壓傳媒有唔同手段，有啲血腥暴力，當街斬人，有啲製造白色恐怖，逼傳媒收聲，兩者對新聞自由嘅危害性都不容忽視。但係對於呢種明目張膽打壓傳媒嘅白色恐怖，嗰啲開口自由、埋口民主嘅政客何曾伸張過正義吖？又何曾為新聞自由大聲疾呼過吖？講到底，對於政客嚟講，民主只係一件迷惑公眾嘅華麗外衣，自由只係一件撈取資本嘅政治工具咋，叮！