城中鏡：科烏姆慶生請埋朱克伯格夫婦

WhatsApp不久前被facebook豪擲一百九十億美元收購，啱啱呢個星期一就係WhatsApp創辦人之一兼行政總裁科烏姆（Jan Koum）嘅生日。對於Jan嚟講，呢單大刁可能係最豐厚又難忘嘅生日大禮。

唔講唔知，原來WhatsApp同科烏姆都係生於二月二十四日！當年科烏姆就喺自己生日創辦呢個風靡全球嘅手機即時通訊程式，所以二月二十四日亦係WhatsApp啱啱好五歲嘅日子。當日科烏姆去咗巴塞隆拿，出席世界手機代表大會（Mobile World Congress）後，帶同傳聞中嘅女友到餐廳慶祝生日，仲請埋南韓藝人Psy撐場，facebook行政總裁朱仔同老婆Priscilla Chan亦有參加。

雖然加埋都只係五個人，但場面可謂皆大歡喜。科烏姆嘅緋聞女友芳齡二十三歲，係俄籍名模Evelina Mambetova，靚女一名，Jan實在係「江山美人兩兼得」。不過，科烏姆向來行事作風都好低調，唔單止慶祝方法簡單，連自己嘅Twitter網頁上都無表明自己作為WhatsApp行政總裁嘅身份，而喺LinkedIn上亦只係簡單輕鬆地介紹吓自己。