城中鏡：為慈善開金口 官太獻唱 老公獻花
國際婦女會日前舉行「名人名曲慈善夜」，邀得幾位好少露面嘅官太同名人粉墨登場，包括廉政專員白韞六太太Bonnie付燕紅、懲教署署長單日堅太太Carmen黃嘉敏等開金口。老婆上台，老公各人買定鮮花，等老婆唱完歌就飛身上台獻花，認真醒目。
官太同名人齊粉墨登場，台風有唱家班水準。右起：白韞六太太付燕紅、單日堅太太黃嘉敏、鄧慕蓮同彭徐美雲等。
太太唱完歌，單日堅即刻上台獻花，十分識做。
女童軍名譽副會長鄧慕蓮（左）為善舉捐出十萬元，友人關凱琳（右）大讚善心。
講到唱歌，白太Bonnie同單太Carmen係專家。Bonnie自爆當年喺詩歌班唱女高音，邂逅唱男高音嘅白Sir，真係「不唱不相識」。今次為慈善，Bonnie苦練兩個月，難得姊妹們好齊心，一拍即合。唱歌仲係單Sir同太太Carmen嘅「月老」，佢哋喺中學合唱團齊唱聖詩，單Sir唱男低音，Carmen就唱女高音，婚後兩公婆繼續「夫唱婦隨」。
南非歎完巨鮑 鄧慕蓮中氣足
「製衣女王」兼女童軍總會名譽副會長Irene鄧慕蓮出錢又出力，當晚捐出十萬元支持善舉之餘，更上台與眾官太合唱《迎春花》、《祝福你》等多首金曲。Irene剛暢遊南非回港，勁擦手掌咁大嘅鮑魚，又狂掃十多箱紅酒，難怪唱起歌來心情大好，中氣十足。
獲一眾官太力撐，國際婦女會主席彭徐美雲帶頭以歌聲答謝一眾善長，唱出《明日話今天》、《蔓珠莎華》等名曲，邊唱邊跳，台風十足。彭太笑言，多得老公買部音響放喺洗手間，等佢沖涼時順便練歌。當晚音樂會合共籌得一百七十萬港元，善款用作資助旗下老人中心服務。
