SUN搞作：少膽虫手記：供養父母者減薪

講時講，呢份財政預算案最令人失望嘅，莫過於取消家家戶戶電費補貼，就連淫賤黎都覺得肉赤：「虫，大拿拿千八蚊呀，你咪睇我成日擺腦細款，我有幾霉，你心照啦！」咁又係，壹全霉搞乜衰乜，就算有金山銀山都敗晒啦，難怪淫賤黎對區區千八蚊咁上心。

淫賤黎見我流露出憐憫佢嘅眼神，即時打蛇隨棍上，向我攤大手板：「虫，不如你代鬍鬚佬畀番千八蚊我！」嘩！你當我少膽虫水魚咩？呢鋪點都唔屈服，但係點先可以保住荷包呢？此時，本虫想起預算案增加供養父母免稅額，即時有計：「腦細，我知你性格就係見不得人好，出面班低級員工，要供養父母嘅就全部減薪，幫你報仇雪恨！」淫賤黎一聽，立刻綻放出滿意嘅笑容，我了解，淫賤黎笑，唔係因為自己開心咗，而係人哋痛苦咗，而我，亦都藉住低級員工嘅痛苦保住一千八百大元。