話時話，依家立法會開會經常開足幾個鐘，好多議員中途都會離開會議廳舒展筋骨或處理其他事務，亦曾經多次因為唔夠法定人數，導致流會。為免議員錯過發言時間、投票或流會，秘書處會透過傳呼機通知議員。

不過，喺呢個人人有手機嘅年代，傳呼機幾乎要擺入歷史博物館，所以有議員就提議秘書處加設議員WhatsApp群組，方便聯絡。不過，WhatsApp群組有人數限制，秘書處淨係諗點樣將議員分組都已經諗到頭都大埋，咁就睇吓秘書長陳維安有乜計嘞？

電話唔想畀對家知

其實，依家個別事務委員會都有WhatsApp群組，議員組團考察時亦都以WhatsApp方便溝通，但講到為全體立法會議員設群組，就唔係咁簡單喇。立法會有七十個議員，但WhatsApp每個群組最多只能容納五十人，加埋秘書處職員起碼要開設兩個群組。秘書處對於點樣分組都好頭痛，如果單以泛民主派同建制派分組，秘書處又驚被人質疑透明度同係咪公平公正，如果抽籤，部分議員又唔想被敵對陣營知道私人電話號碼，所以仍未有兩全其美嘅方法。

響五分鐘曾經測試

另外，依家表決響鐘五分鐘，議員就要返會議廳投票，比喺中環舊立法會大樓時多咗兩分鐘。原來秘書處喺立法會搬至添馬艦新大樓時出動咗四十位職員，幫手測試喺新大樓唔同角落行返會議廳要幾耐時間，最終就定咗係五分鐘，所以班議員冇得賴話唔夠時間返會議廳喇！

第一手消息請下載on.cc東網iPhone/iPad/Android/Windows Phone Apps