立法會上睇艷照 何俊仁變何盡淫
財政司司長曾俊華尋日喺立法會發表「減甜」預算案，一個唔覺意變成「鹹濕」預算案，仲係鹹到入骨嗰隻。點解？問民主黨立法會議員何俊仁喇，佢色膽包天，居然眾目睽睽之下喺議事堂睇艷照喎，問你服未！
即係咁，正當財爺口水四濺宣讀預算案之際，何俊仁靜雞雞以平板電腦上網搜索性感女郎照片，一張接一張，全部都係熱辣辣三點式女優寫真，以為神不知鬼不覺，點知佢嘅猥瑣行為被本報記者攝入鏡頭。好明顯，何俊仁關心女性嘅「事業線」，絕對大過關心預算案，叫佢監督政府喎，你話係咪嘥氣吖！
正所謂，好事不出門，醜事傳千里。何俊仁呢輯急色「睇女圖」驚艷全城，唔止迅速喺網上瘋傳，引起全城嘩然，仲搞到「揚威國際」，連外國網站都極速轉貼添，呢鋪佢想唔臭名遠揚蜚聲國際都唔得喇。正如網民話齋，何俊仁應該改名何盡淫、AV仁至啱！
你話係咪羞家吖，堂堂民意代表居然喺議事堂上睇艷照，唔通市民選你何俊仁入立法會係監督鹹網咩？尋日香港發生咁多新聞，又公布預算案，又有報館高層被斬傷，又有電視台高層人事地震，何俊仁乜都唔理，只係埋首睇艷照，究竟佢有冇心服務市民，大家心照喇。
最好笑嘅係，何盡淫仲死雞撐飯蓋，話最近太攰，所以開會分咗心喎；佢仲堅持照片不屬色情相片添。咁都講得出，仲有冇羞恥之心o架。都係網民講得啱，「仁蟲」艷照醜聞影響惡劣，一來不務正業，二來褻瀆立會，三來教壞細路，簡直離晒大譜。嗱，何俊仁唔使狡辯嘞，如果仲有廉恥嘅話，引咎辭職喇！
不過咁，都難怪何俊仁咁厚顏o架，佢爆醜聞簡直當食生菜。呢，幾年前本報踢爆佢屋企僭建，有相為證，圖文並茂，佢咪一樣扮晒無辜，成條軟皮蛇咁。仲有吖，舊年爆出財團請立法會議員豪遊法國醜聞，何俊仁係其中一名醜聞主角，佢都係話自己冇心，淨係講句對唔住，又繼續出糧做議員。僭建又話冇心，接受財團款待又話冇心，連睇艷照都話冇心，睇嚟佢做議員都係冇心嘅喇，不如打正旗號轉戰AV界做男優吖，笨！
話時話，香港納稅人真係冤枉，公帑唔係供養守財奴財爺，就係鹹濕議員，香港烏煙瘴氣，政治生態點可能唔墮落，民怨又點可能唔爆煲吖，叮！
