太平洋投資管理(Pimco)行政總裁埃利安突然辭職後,坊間盛傳埃利安與「債券大王」格羅斯不和,當事人例牌否認,但《華爾街日報》引述消息人士爆料,二人曾公然駁火。話說喺舊年六月某天,格羅斯同埃利安喺超過十名同事面前公然駁火,格羅斯質問佢:「我有四十一年卓越投資紀錄,你呢?」埃利安反駁話:「我已厭倦幫你收拾『蘇州屎』。」

埃利安

格羅斯

Pimco現任同已離職員工仲踩多一腳,大數格羅斯魔鬼上司作風,原來大部分Pimco投資人員朝早四點半、天未光就返到公司,至少下午五點至走得;格羅斯唔鍾意員工同佢傾談甚或有眼神接觸;如果有人製造噪音,即使係投資話題都會遭訓斥;格羅斯對投資委員會報告要求嚴格,曾罵忘記標上頁數嘅員工,亦唔鍾意員工同佢唱反調。

據聞格羅斯喺埃利安提醒下曾經改變吓,但好快又故態復萌。二人關係漸起變化,格羅斯講明就算冇咗埃利安都能掌控大局。試過埃利安喺會議中與同事討論債券以外嘅投資議題,格羅斯好不屑咁走出會議室,搞到會議中斷,兩人關係差到咁明顯,埃利安唔走至奇啦!

第一手消息請下載on.cc東網iPhone/iPad/Android/Windows Phone Apps