城中鏡：預算案悶蛋 高官出招自娛
財爺鬍鬚曾尋日宣讀新一份財政預算案，一班官員唔想悶到瞓着，惟有各出奇謀搵嘢做解悶。發展局局長「波波」陳茂波就最醒，帶埋成疊文件去立法會睇，當其他高官不斷放蚊瞌眼瞓，佢就不斷刨書睇文件，仲對住幾個圓形圖表研究咗好耐添！
陳茂波（左）專心睇文件解悶，陳家強（右）就除低眼鏡捽眼。
商務及經濟發展局局長蘇錦樑就經常拎起部電話同人WhatsApp，而保安局局長黎棟國就用手機上網睇預算案新聞，莫非佢覺得財爺講得太悶，上網睇會精彩啲？
鬍鬚曾太太黃蓮華尋日都有全程坐喺官員席聽住老公「讀書」，當社民連梁國雄衝上前向鬍鬚曾掟假牙時，曾太就金睛火眼咁(目及)實，驚副假牙會好似隻雞蛋咁再次唔小心掟中老公。會後被問到點睇今年預算案，曾太就露出一個意味深長嘅微笑，拋低一句「佢年年都咁好」後就離去。
