城中鏡：雪地隊茅台 莊家兄弟醉型
茅台之友協會早前舉辦一年一度嘅香江之夜，協會青委主任Albert莊家彬最唔話得，喺晚會上分享早前同細佬莊家豐拍住去日本滑雪時，趁機帶支茅台到雪地飲，仲留影見證呢一刻，唔講仲以為佢哋帶茅台去挑戰珠峰添！
一眾茅台之友上台高唱《愛拚才會贏》，氣氛高漲。
莊家彬（左）同莊家豐兩兄弟帶住茅台到雪地豪飲。（受訪者提供）
李玥（左起）、陳丹丹同詹嘉莉都去飲茅台湊湊熱鬧。
當晚去暢飲嘅名人好多，包括協會監事長楊孫西、副會長Jimmy吳永嘉同施榮忻，仲有好多後生靚女，包括青委成員兼「手套大王」詹氏第二代Kelly詹嘉莉、漢生堂董事長李嘉音嘅囡囡李玥同陳丹丹等人。Kelly話最近忙於深圳開拓美容事業，經常游走中港兩地。
講到晚宴嘅高潮莫過於「三劍俠」楊孫西、施子清同盧文端，帶頭同協會核心成員上台高唱閩南名曲《愛拚才會贏》，令現場氣氛高漲。賓客仲意猶未盡，一口氣「安歌」兩次，眾人藉住幾分酒意高歌，零舍豪邁。
Jimmy話最近受到內地吹起節約風影響，原本被搶高嘅茅台價格大幅回落，由最高時三千八百元一支，跌至二千四百元。茅台跌價對香港冇壞，因過去太多內地人來港買返去送禮，令到有心品酒嘅人卻步，依家有唔少港人開始買嚟飲，將壞事變好事。
