SUN搞作：少膽虫手記：黃色藝術家
淫賤黎呢排愛上畫畫，仲自比梵高，誓要畫出「充滿藝術感」嘅傑作，於是壹全霉總部近日就變成咗佢嘅練習場，日日出現一大堆「超現實主義」嘅畫作。「虫，快啲評價吓幅畫！」淫賤黎指住幅有一撻黃色嘅污物，「腦……腦細，呢幅……畫抽象得嚟，又似霉菌，有多種意義，蠢啲都唔識睇呀！」淫賤黎即刻一支筆丟過嚟，「我畫緊嘅係一朵花，一朵盛放嘅菊花呀！」少膽虫唯有應聲附和：「好靚！一絕，腦細真係應該開畫展！」淫賤黎聽了樂道：「我要全世界都欣賞我嘅作品！」
翌日，少膽虫甫返工，淫賤黎即怒火中燒，仲掟份《爛果》落地，「你做細嘅都唔識保護我嘅大作？」少膽虫好疑惑咁問：「腦細，你講啲咩呀？」淫賤黎指住份報紙話：「你睇吓，藝術家作品被剷走呀！我嘅心血無晒喇！」唉，淫賤黎今次又睇錯，邊會有人敢破壞佢嘅傑作？「腦細，睇清楚！你嘅大作仲展出緊，呢，垃圾桶旁邊咪有撻黃色嘢囉……」
