政壇：搞搞政：靠「老」虎仔翻身民協難捱
民協嘅KK馮檢基前年競選立法會超級區議會議席時，曾豪言要衝出九龍西，仲搵嚟副主席譚國僑參選佢原本嘅九龍西議席，諗住如果好彩連中兩元，就可打破「一人黨」嘅宿命，可惜事與願違，譚國僑保唔住KK個九龍西議席，仲敲響支持者流失嘅警鐘。下屆區議會同立法會選舉明年起相繼殺到，KK想搵接班人保住民協呢個老字號，但結果一波三折，更因為青黃不接，焗住要「老」虎仔出山。
設計圖片及對白
雖然KK喺今屆選舉得票唔低，但唔好忘記佢嘅泛民主派對手就只有白鴿黨，喺分餅仔下可以話係仲有機會。不過，上次冇派人出選嘅公文袋同工黨都考慮緊派人挑戰超級區議會議席，如果兩黨到時決定參選，而一六年立會選舉方案又原地踏步，佢分分鐘要靠邊站，甚至被人搶走議席。
最後民協面對青黃不接亦都係個不爭嘅事實，經過上次立會選舉嘅經驗，譚國僑同中途退選嘅「老虎仔」廖成利似乎幫個黨吸唔到幾多票，多年來力捧嘅莫嘉嫻又因為生第二胎而暫時退下火線，下屆會唔會接力參選立會仍係未知之數。
老虎仔喺民協咁耐，政途都好坎坷吓，雖然佢早前揚言要接手參選九龍西，仲自比「山貓」，以消滅西九新動力梁美芬呢個「鼠王芬」為己任，但有幾大機會就不得而知喇。如果民協再唔銳意推行年輕化，「亡黨」真係遲早嘅事。
