政壇：勁收花紅李小加變大加

港交所尋日派成績表，雖然業績冇預期咁好，但高層人工花紅照樣「大豐收」，好似行政總裁李小加，舊年底薪、現金花紅、股份獎授福利等，合共攞成三千八百多萬元，比上年度二千四百多萬元，大幅增加百分之五十五，今次唔係「小加」，係「大加」至真。

睇番前年，李小加嘅總收入只係增加百分之六點五，舊年度總收入增幅卻高達百分之五十五，但港交所舊年度純利只上升百分之十一。唔知小股東覺得合唔合理呢？

之不過，李小加前年斥天價買返嚟嘅LME，暫時仍未生金蛋，而且引致嘅折舊及攤銷等等更拖累港交所業績。唔怪得尋日分析員會議，大部分都係追問有關LME嘅問題，比如話LME幾時先會提供顯著盈利貢獻等。