前日係商務及經濟發展局政治助理陳百里同女朋友Michelle李淑媛結婚嘅好日子，局長蘇錦樑捧場之餘仲幽默致辭，呼籲佢快啲為人口政策作貢獻，仲同立法會議員謝偉俊齊齊高歌Five Hundred Miles祝福一對新人。不過，百里尋日並冇即時起行去度蜜月，反而係立即返工聽財爺發表財政預算案。

陳百里（右）同Michelle喺預算案發表前夕拉埋天窗。

一班區議員齊到賀，包括旺角區鍾港武（左起）、深水埗區嘅鄭泳舜及黃達東同沙田區嘅楊文銳。

百里同Michelle喺一○年一個科技活動上認識，佢哋一拍即合拍拖四年幾，百里話太太係個好善解人意嘅人，就算唔去度蜜月掛住工作，太太都非常體諒佢喎！由於太太係河南省信陽人，所以佢哋之後會攞假返信陽再擺一次酒，預計暑假先會去度蜜月。

雙方父母似乎亦對一對新人頗為滿意，外父畀足女婿一百分，但老爺就話新抱暫時得九十分，咁餘下十分去咗邊？百里嘅爸爸話如果抱埋孫就一百分喇，因為囝囝係獨生子，依家已經三十八歲，愈快生仔愈好咁話。

第一手消息請下載on.cc東網iPhone/iPad/Android/Windows Phone Apps