早喺一個月前有傳煙草稅大幅增加一成,話每包煙可能加到八十四元,令唔少基層煙民擔心捱貴煙,幸而最終「高開低收」,政府宣布煙草稅只係輕微加四元。唔知立法會內一眾煙民議員,對加煙稅有乜嘢睇法呢?我哋問咗幾位議員,好似進出口界「象哥」黃定光、九龍西直選嘅Ann蔣麗芸同商界(二)嘅廖長江,佢哋都異口同聲話加幾元煙稅好難令佢哋食少啲。睇怕單靠加煙稅去控煙,只係政府一廂情願囉!

設計圖片及對白

蔣麗芸:少食冇影響

象哥好老實話,自己二十歲開始食煙,至今差唔多四十幾年煙齡,個肺老早就同煙混合咗。佢仲同老婆、工聯會會長林淑儀講到明,自己唔會戒煙,亦好難戒到煙。如果真係有一日見到佢神奇戒煙,就代表佢身體轉差,相信佢老婆都唔想見到。齋噏冇用,行動最實際,象哥聽完預算案就立即行動,即刻走出立法會歎支煙,直接用行動控訴加煙稅。

同象哥係黨友嘅阿Ann就話,自己向來好少吸煙,只係久唔久一支半支,所以加唔加煙稅都影響唔到佢。不過,佢話小數怕長計,加煙稅對基層煙民嚟講係好大負擔,佢就唔建議加煙稅嘞!

無論係煙齡同煙癮都唔細嘅商界代表廖長江,認為加幾元煙稅對佢嚟講冇乜影響,相信唔會因此吸少幾支煙,又話加幾元不如唔好加啦!無論煙稅加得多唔多,始終吸煙對身體無益,奉勸各位議員都係食少啲好啲。

第一手消息請下載on.cc東網iPhone/iPad/Android/Windows Phone Apps