絕代雙貪佗衰家 除奸惟靠第四權

嗱，有「中央智囊」之稱嘅中國社會科學院發表《法治藍皮書》，除咗大談法治之外，亦提及香港「廉政風波」，批評「兩位高級官員行為令香港社會有點擔憂」，前年廉署決定立案調查曾蔭權嘅貪污舉報，令以清廉聞名嘅香港行政制度受到挑戰；報告仲點名談論湯顯明嘅貪腐醜聞，話佢引發嘅風波顯示社會對反貪嘅認同非常重要。而最值得一提嘅係，社科院大讚香港有傳媒自由，「正是由於傳媒的敬業精神，才能把社會的關注聚焦在這一事件上」。

冇錯嘞，絕代雙貪臭名遠播，嚴重損害香港廉政形象，如果唔係傳媒不畏強權，揭露貪官醜行，社會只會更加黑暗，核心價值只會蕩然無存咋。大家都知道，傳媒一向被視為監督政府嘅第四權，香港行政、立法、司法三權各懷鬼胎，互扯貓尾，搞到七國咁亂，唯一可靠嘅就係傳媒。呢，社科院大讚香港傳媒敬業，證明太一叮唔係自賣自誇。同樣值得留意嘅係，《法治藍皮書》點名批評絕代雙貪，呢個觀點就算唔能夠代表中央立場，亦足以證明內地人民對絕代雙貪嘅行為非常反感。

所以話，維護新聞自由就係維護核心價值，絕對唔可以妥協o架。可惜嘅係，雖然傳媒圖文並茂報道踢爆絕代雙貪嘅醜行，但廉署查來查去都冇下文，連律政司前刑事檢控專員江樂士都睇唔過眼，多次發炮轟擊。試諗吓，貪曾醜聞曝光已經兩年，點解查到今日仲係無聲無息呢？香港回歸以來不斷沉淪，惟有廉政及法治比內地優勝，如果連呢兩項核心價值都墮落埋，咁同內地有咩分別吖？「一國兩制」仲有咩存在價值吖？

正如古人話齋，安民之本，首在懲貪。傳媒監督政府天經地義，當局必須虛心接受，至可以糾正錯誤，改善施政，重建廉政及法治。如果官僚為咗面子死不認錯，甚至官官相衞咯喎，咁就只能繼續墮落嘅咋。反貪係世界潮流，順之者昌，逆之者亡，家陣連內地都要打老虎喇，香港又點可以例外吖，叮！