SUN搞作：少膽虫手記：表妹你好嘢
「少膽虫，帶我表妹落尖咀行吓！」淫賤黎身邊呢位少女，真係嚇到少膽虫眼都凸埋，「唔通你就係傳說中嘅『美少女戰士』？敢問芳名。」少女身穿水手服，睥睨少膽虫，「我叫rabbit，我鄉下最潮嘅打扮你都識，表哥，睇嚟香港唔係人人係阿燦！」
淫賤黎唯唯諾諾，跟手就拉少膽虫埋一邊，「嗱！少膽虫，我表妹啱啱落嚟，你好好招呼佢！」少膽虫絕非心理唔平衡，日日反中亂港，依家竟然要……「腦細，咁同《爛果》立場好似……」未講完，淫賤黎已經怒睥少膽虫，「我一向都係為人民……幣服務！」原來又係錢作怪，少膽虫無奈，惟有領命。
「我要買包包！」少膽虫一聽，好聲好氣問︰「咁你要咩包？菠蘿包定叉燒包？」閃電之間，少膽虫就硬食一巴，「我要買名牌包包！」原來係要買手袋，知衰嘅少膽虫即刻帶rabbit落廣東道掃貨，點知就遇上，「反赤化！反蝗蟲侵港！」少膽虫為咗腦細，惟有扮晒大義凜然，擋喺rabbit前面，「你哋咁做係涉及種族歧視！」正當少膽虫以為自己攞晒分嘅時候，後腦突然一陣劇痛，轉頭一望，出手嘅竟然係表妹，「你做咩打我？」
「大家都係強國人，邊度會有種族歧視？你咁講即係分裂祖國，今日就等我替天行道，儆惡懲奸！」一片反蝗之聲中，頓時多咗幾聲捱打嘅慘叫。
