金色好容易畀人好土豪嘅感覺，要將金色着上身，真係唔係人人carry得到。凡事都有例外，原來花旗集團香港及澳門區行長Weber盧韋柏兩公婆都好夾金色，大方又得體。

盧韋柏（左）同太太（中）一個打金呔一個着金色長裙，襯到絕。

為咗配合一年一度嘅「花旗銀行香港金盃」賽馬日，聽講成個活動都以金色作主題，連dress code都定為金色，聽講Weber專登買咗條金色呔，襯番老婆一襲貴氣嘅金色長裙。

今次活動場面實在係金碧輝煌，仲吸引咗大約二百三十名賓客出席，唔知係咪因為活動設有一個「最佳衣着大獎」，所以每位賓客都悉心打扮，出盡法寶，喺衣着加入金色嘅元素，女士多數都戴金耳環、金頸鏈，再唔係就襯埋金色外套，男士就可以簡單啲，打番條金色呔就搞掂，又或者戴低調嘅金錶囉！

雖然Weber同太太襯到絕一絕，之但係佢哋最後都失落「最佳衣着大獎」，聽講男得獎者由頭到腳都以金色系打扮，真係無得輸!

第一手消息請下載on.cc東網iPhone/iPad/Android/Windows Phone Apps