城中鏡：少女棋王分享勝利方程式
捉棋同投資好似大纜都扯唔埋，但中銀香港就話道理一樣，仲搵咗鼎鼎大名、連全球首富蓋茨都豎起大拇指稱讚嘅國際棋聯特級大師侯逸凡，嚟印證兩者嘅心路歷程。
侯逸凡（中）收到個特大棋盤蛋糕，預早慶祝生日。
讀者可能以為做得國際象棋大師，肯定年過六十飽歷滄桑，查實侯逸凡係一位嬌滴滴嘅美女，年僅十九歲就拎咗三屆女子國際象棋世界冠軍，蓋茨都話值得大家學習。佢向在場嘅觀眾分享話捉棋嘅時候要非常專注，唔可以畀情緒影響表現，同埋落棋無悔，所以要有策略，諗得長遠啲，但又要識得臨場應變，唔怪得佢哋話捉棋同投資嘅方程式一樣啦。
呢個正正係請佢嚟嘅原因，中銀香港資產管理行政總裁區景麟（King）話，優秀嘅基金經理正如一個優秀嘅棋手，需要有耐性，又要嚴守紀律，最緊要係捉棋難免會輸，好嘅棋手識吸取教訓，好嘅基金經理都會從失利中學習，阿King仲話三個囝囝都有學棋添！
雖然侯逸凡站喺世界棋壇最高端，但佢話擁有今日嘅成就，超過九成靠後天努力。喺六十四格棋盤以外，佢話自己只係一個平凡女仔。過幾日就係佢二十歲生日，中銀香港好貼心，特登整咗個特大棋盤蛋糕送畀佢。
