香港傷健策騎協會早前舉行慈善晚宴，籌委會主席Allen史立德使出渾身解數幫手籌款，派出太太史顏景蓮第一次上台主持慈善拍賣，囡囡史佩加就化身模特兒展示慈善拍賣嘅珠寶鑽飾。喺賓客熱烈競投下，話咁快就有逾三百萬元進帳，總算不負眾望。

身形高挑嘅史佩加展示供拍賣嘅鑽飾。

史立德（左）同太太史顏景蓮（右）瞓身幫手籌款。

張仁良同識講廣東話嘅法籍太太Christine開心出席。

何猷啟（左二）同一班城中二代齊撐董必政（右二），左一、右一分別係佢哋友人Kelvin同Kenneth。

猷啟學成歸來幫媽媽

當晚出席名媛同名人多不勝數，「翡翠皇后」董吳玲玲細仔Donald董必政亦招呼一班朋友去支持，席間有位高挑英俊嘅後生仔，睇真啲原來係賭王三太陳婉珍嘅細仔何猷啟。猷啟話舊年讀完書返港，依家幫媽媽打理房地產同股票生意。Donald話舊年參加一個內地交流團，猷啟都係團員，兩人初相識就好啱傾，仲成為好朋友添！

教育學院校長張仁良同法籍太太Christine都有嚟撐場，好多人都知張太講得一口流利廣東話，估唔到佢仲有個中文名叫張雪婷。張太話學講廣東話方便溝通，生活先冇咁悶。

「九巴金公主」Winnie伍穎梅同男友許晉平亦拍拖到場，追問Winnie幾時拉埋天窗，佢甜笑話：「想要幾時就幾時！」睇嚟兩人感情穩定，隨時有喜訊喇！

第一手消息請下載on.cc東網iPhone/iPad/Android/Windows Phone Apps