政壇：搞搞政：富貴黨白鴿黨拍住上 洩合體玄機？
依家嘅政治生態變得好快，好似分屬建制派嘅富貴黨同被視為溫和泛民嘅白鴿黨，尋日歷史性召開聯合記者會，共同發表公共醫療改革建議書。兩個政黨都有二十年歷史，突然情投意合走埋一齊，破天荒聯手合作，你話無政治含意邊有人信，莫非呢個係合組「自民黨」前嘅熱身？
設計圖片
富貴黨同白鴿黨舉行聯合記者會，明眼人都知建議書非主菜，主菜係兩黨破天荒企埋一齊，隱然有當年八黨聯盟合作嘅少少影子。事不離實，兩黨對於呢個聯合記者會極為重視，富貴黨黨魁「田少」田北俊同副主席方剛出席，白鴿黨則有現任主席劉慧卿同前任主席「鐵頭仁」何俊仁現身，或多或少顯示對呢件事有幾重視。
兩黨嘅負責人喺記者會「眉來眼去」，但兩黨高層都死口唔認有政治訊息，田少否認同政府對着幹，又疑率先「封後門」，直指雙方合作只限於民生議題，因為政治議題同白鴿黨好難有共識；鐵頭仁亦講明喺政治問題上，本身同富貴黨無乜合作空間。
講到尾，政治結合都離唔開「利益」兩字，如果唔係白鴿黨頻頻畀激進民主派狙擊，富貴黨又因堅持「中堅中立」路線拒絕逢政府政策必撐，疑似畀主流建制派邊緣化，相信兩黨都唔會有聯手合作嘅念頭。
究竟呢種「政治結合」有幾長久，甚或任何一方突然立場急轉彎，隨時會變成死亡之吻，正所謂政治一日都嫌長，都係「聽其言，觀其行」啦！
