政壇：微軟蓋茨重奪全球首富
胡潤研究院做嘅全球富豪榜尋日發表，結果唔太意外，微軟創辦人蓋茨揮低墨西哥富豪斯利姆，重奪全球富豪首位，財富達到四千一百億元（人民幣．下同）。而Tesla嘅始創人埃隆馬斯克財富就上升四倍達四百億元，堪稱榜內飆升速度最快嘅富豪。
蓋茨
其實，呢一千八百六十七位擁有超過十億美元嘅上榜富豪，資產真係多到想像唔到，佢哋合共總財富達到六萬九千兆元美金，仲勁過第三大經濟體系日本嘅GDP！上榜富豪平均年齡四十四歲，比舊年大一歲，女性佔九分之一，比去年略高。
亞洲擁有最多十億美元富豪，有八百二十四位，大部分從事房地產行業，華人富豪比舊年多一百零八位，達到四百五十七位，佔全球百分之二十四，其中二百九十一位嚟自大陸，六十四位住喺香港，三十七位喺台灣，兩位喺澳門，六十三位住喺外國。全球前一百位中有七位係華人，包括長和系主席李嘉誠（全球排名第十二位）、萬達集團董事長王健林（排名二十六位）、恒地主席李兆基（排名三十四位）、新世界創辦人鄭裕彤（排名四十九位）、騰訊主席馬化騰（排名七十位）。
