政壇：巴菲特教路唔好密密炒

巴菲特喺信中勸喻股東，投資股票時唔好密密炒，應將股票當成投資房地產一樣，睇長遠潛在利潤，即使短期價格chok到嘔都唔使理。仲有一個原則，千萬唔好買自己都唔明嘅產品，所以科網股一直唔係股神杯茶。

巴菲特提到自己投資兩個小型房地產嘅經驗，佢分別喺八六年同九三年房地產市場出現泡沫時，買入一塊四百英畝嘅農地同紐約大學附近嘅零售房地產，睇好佢哋回報率可達百分之十以上。佢透過呢兩個例子，希望大家喺投資時要將重點擺喺未來生產力上，而唔係單單期待將來以高價賣出資產。另外，佢仲提醒投資者切忌對股價表現得唔理性，而跟隨大圍意見，其實咁等於浪費時間。

如果你仍然覺得唔夠喉，或者可以留意五月舉行嘅巴郡股東大會。呢個被稱為「資本主義者胡士托」嘉年華嘅活動，每年都吸引三至四萬名股東參加，股東嘅心態就好似朝聖咁，會上除咗可以一睹股神風采外，到時將可參觀巴郡收購嘅私人飛機同聚餐，上年佢哋仲喺奧馬哈搞咗個「Invest in yourself」五公里跑步比賽，今年呢個活動亦會繼續舉行。