政壇：屋署食署三煞位換人
政府尋日宣布高層官員調動，現任屋宇署副署長許少偉將接替即將退休嘅區載佳，出任屋宇署署長，現任環境局副秘書長劉利群就會擔任食物及環境衞生署署長。不過，屋宇署同食環署經常都面對人手壓力等問題，區載佳更曾被要求下台，可以話兩個都係三煞位，睇嚟兩位新署長日後都要謹言慎行、醒醒定定喇！
設計圖片及對白
燙手山芋難搵人接
劉利群同許少偉分別喺下月十三號同二十九號出任新職，之但係呢兩個署經常都有唔少風波。好似食環署咁，由街市衞生到小販阻街，甚至骨灰龕問題都關佢哋事。而食環署轄下外判員工眾多，仲成日都爆出剝削員工醜聞添。政府上月已宣布原本任署長嘅梁卓文今個月初會調去美國出任香港駐美總經濟貿易專員，至到尋日先正式公布接任人選，可見想搵人接手呢個燙手山芋都唔係易事。
屋宇署近年亦屢次捲入漩渦。自近年多名政府高官、名人被揭發僭建之後，負責執法嘅屋宇署就被外界盯緊，諷刺嘅係區載佳本身亦被指涉嫌僭建，申訴專員公署早前更不滿該署處理名人僭建有延誤情況。僭建問題受關注，該署工作量自然增加，二百名測量及技術人員早排亦因不滿工作量大而罷工，仲高呼撤換區載佳，改為「空降」政務官接掌屋宇署，真係一波未平一波又起。喺呢個時候退休，都可算係甩難啦！
依家許少偉接掌屋宇署，雖然都未能符合員工「空降」政務官嘅期望，但許少偉本身處理開劏房、僭建問題，一○年馬頭圍道塌樓事件亦有份去視察跟進，應該都有資深經驗。再講，佢都已經五十七歲，做多幾年都夠鐘退休，就算有乜唔着，至多咪好似海事處處長廖漢波咁，喺海難事件後就退休拍拍屁股走人囉！
