託兒服務爭崩頭 誰解媽媽後顧憂
政府成日話要締造有利環境鼓勵生育，應付人口老化挑戰喎，弊在官老爺講就天下無敵，做就冇心冇力，配套措施跟唔上，淨係資助託兒服務「難過入大學」呢一項，已經勁過世界上最勁嘅避孕藥。
呢嗱，有關注團體訪問咗全港多間幼兒中心及幼稚園幾千名家長，結果顯示託兒服務直接影響生育意願。九成受訪者認為理想嘅子女數目係兩個或以上，不過有約一半家長未「達標」。
明明想生，點解又唔生呢？原來有苦衷嘅。超過八成受訪者話，如果有合適嘅日間託兒中心，生仔意欲會高啲；更有九成半家長話，如果增加免費全日幼兒服務及彈性上班職位，會考慮改變主意，生番個小寶寳喎。
呢嗱嗱嗱，事實再次證明，香港人唔係唔想生，而係唔敢生咋。原因一字咁淺，生活指數年年上升，但打工仔人工就歲歲原地踏步，在職貧窮問題愈來愈嚴重，唔少基層家庭要夫妻雙雙打工，至勉強維持到生活開支，邊有能力請家傭吖，如果子女年幼，屋企又冇長者可以幫手，直頭踢晒腳喇。如果有資助託兒服務，咁就一天都光晒咯，可惜呢類服務學額有限，申請爭崩頭；而私家託管服務收費又貴，根本負擔唔起。
正如大埔有家庭主婦訴苦，細仔半歲大開始輪候日間幼兒中心，等到一嵗七個月至排到，仲要冇雷公咁遠去到粉嶺，你話係咪離譜吖。其實，佢個仔排到位，都算幸運囉。
係人都知，增加託兒服務係免除後顧之憂嘅治本之策，弊在官老爺懶懶閒踢極唔郁，資助託兒服務名額長期不足，欠缺監管等等問題，一直得唔到解決。關注團體指出，本港約有十萬名兩嵗以下兒童，託兒服務資助名額得一千個咁大把，比例係一比九十九，「仲難過入大學」，唔爭崩頭都唔得喇，叮！
講嚟講去，罪魁禍首就係前特首曾蔭權爵士，任內做邊瓣衰邊瓣，好大喜功，信口開河，一味嗌市民「生三個」，但係配套措施就欠奉。佢就話可以向權貴黐飲黐食啫，生夠三十個都無問題啦，基層家庭搵食艱難，港產官僚關人個關，試問生三個邊個照顧先？
太一叮都係嗰句，扶助弱勢社群，政府責無旁貸。老齡化社會迫在眉睫，當務之急就係要增加投入改善託兒服務，為家長消除後顧之憂。
人口政策攸關香港競爭力同社會長遠發展，港府繼續蹉跎歲月，小心變成千夫所指嘅歷史罪人吖，叮！
