霍震霆長子霍啟剛前晚現身一個馬術大師賽晚宴，同場有從事物流業嘅王嘉恩，仲有地產界女強人胡幗英同女兒Valerie相約名媛李桂蘭等出席。

霍啟剛話細個已被送到馬術學校學騎馬，好喜歡睇馬術。

李桂蘭（右起）同胡幗英及女兒Valerie相約出席馬術賽。

啟剛透露，太太郭晶晶因身體抱恙而唔能夠一齊嚟欣賞馬術比賽，而佢就好喜歡睇馬術，啟剛話：「覺得馬術好優雅，○九年帶隊去新加坡時都係睇馬術，場地障礙賽易睇啲，盛裝舞步比較難明。我嚟緊會出席好多香港嘅大型賽事做甄選。」

被問及參與咁多體壇活動，係咪想接爸爸棒？佢就話：「唔好咁講，屋企人對運動好有興趣，我只係幫手做少少嘢。」佢又話小時候已被送到馬術學校學騎馬，又笑言：「因為屋企近，而且媽咪望子成龍，乜都想我學。」追問佢覺得囝囝有冇運動天分時，佢話：「有呀﹗佢成日跳嚟跳去，我抱到好攰。」

第一手消息請下載on.cc東網iPhone/iPad/Android/Windows Phone Apps