城中鏡：女童軍團拜彭太唱小鳳腔

女童軍總會前晚舉行新春團拜，一如往年喺佐敦總部開露天美食派對，城中名太齊切燒豬。香港總監彭徐美雲帶病上台高歌助興，歌喉沙沙哋，甚有「小鳳姐」徐小鳳風範。

新春遊大阪回來嘅香港總監彭徐美雲（右）帶病唱歌助興，候任總監何超鳳（左）就去咗歐洲滑雪。

李周美枝（中）為籌備世界女童軍大會忙個不停，副會長陳曦齡（右）同名譽副會長方劉小梅（左）都話鼎力支持。

名譽副會長鄧宣宏雁（左）望香港人和氣生財，善待旅客；旁為東華三院副主席何超蕸（右）。

農曆新年，為避開泰國示威，彭太去咗大阪旅行，幸好未受日本大風雪影響。佢笑言大阪只下微雪，認真係天公作美。候任女童軍總監嘅賭王千金何超鳳都同好友結伴去歐洲滑雪，佢謙稱滑雪技巧麻麻，話未有跌斷手腳返嚟已經好彩。

預告今年超忙

副會長陳曦齡就同名醫老公及歲半孫兒Augustus遊加拿大，孫兒初嘗滑雪滋味，竟然唔怕凍，仲玩得好投入。但返到香港，陳醫生就無暇湊孫，一有時間就跑去深圳睇舖，佢計劃未來一、兩年喺內地開三十間健康食品分店，忙到無時停。

數大忙人，仲有國際事務總監李周美枝。佢預告今年係女童軍超忙碌嘅一年，七月將舉行世界女童軍大會，呢個活動首次在港舉行，屆時將有六百位來自逾百個國家嘅女童軍代表出席，相信會好熱鬧。早前有示威人士反對內地個人遊強攻香港，佢話相信港人好理智，加上訪港嘅女童軍訓練有素，唔擔心會造成混亂。

身為名譽副會長嘅太子珠寶鐘錶執董鄧宣宏雁都反對趕絕個人遊，佢話最緊要人人有工做，和氣生財，唔應該搞分化。佢認為個人遊帶旺各行各業，佢公司都受惠，聘請咗唔少大學畢業生同基層員工，創造更多就業機會。