政壇：搞搞政：雙辣招投票 林健鋒離奇失蹤

封口唔提缺席

以工商界議員為主嘅經民聯，基本立場係反對政府加推樓市辣招，所以地產及建造界議員石禮謙就投反對票，林健鋒雖然係經民聯成員，但由於佢身兼行政會議成員，大家嘅合理期望係佢要投票支持政府。好似上年堆填區撥款一役，就算經民聯劉皇發反對撥款，林健鋒都要焗住同發叔唱反調，支持政府。

正當大家以為佢會一如以往支持政府，以履行行會成員責任時，點知投票一刻竟然唔見咗佢。記者打鑼咁搵都搵唔到佢，直到晚上見佢出席新民黨黨慶，當然追住問佢點解缺席，平時有問必答嘅佢都係封口唔提缺席事件。我哋尋日打過幾次畀佢，但都無覆，似乎佢有難言之隱喎！

林健鋒「失蹤」事件至今仲係一個謎，有另一個版本話喺投票當日朝早，佢同黨友石禮謙去咗食早餐兼密斟，當時佢胃口太好，除咗食晒自己碗沙嗲牛肉麵同腸仔煎蛋，仲食咗石禮謙半份早餐，結果成個下晝肚脹脹，最後佢惟有食幾粒石禮謙提供嘅瀉藥，但隨即好似山洪暴發咁不停去廁所，可能因為咁而投唔到票。真係信不信由你。