政壇：黃英豪全家入場撐愛駒
「新金王」金至尊集團主席Kennedy黃英豪，早前去新西蘭旅行期間屋企被爆竊，尋日佢同家人一齊現身馬場。講起爆竊件事，Kennedy自爆原來屋企本身有保安系統，但當晚囝囝黃宇德夜咗返，所以未嚟得切開啟啲保安系統。好彩損失唔算多，但由依家起佢哋一定會開番足啲保安系統咁話。
黃英豪（左二）一家四口入場支持愛駒。
Kennedy尋日罕有帶埋囡囡黃宇恆、囝囝黃宇德同太太一齊入馬場為愛駒打氣，事關佢話兩個乖仔乖女分別喺去年十一月同十二月加入咗馬會成為會員，目前仲準備緊將兩人嘅名加落佢匹「香港至尊」度，等佢地一嘗做馬主滋味，所以以後會多啲帶佢哋入嚟馬場感受現場氣氛。對於近日嘅「驅蝗行動」，Kennedy就話對佢哋嘅生意影響唔係好大，但就話香港係一個自由開放嘅地方，唔應該用咁嘅態度對遊客，又話如果遊客覺得逼或者唔舒服，佢哋都唔會嚟，應該要互相尊重先啱。
