政壇：掟飯男上位激化社民連
社民連尋日選出新一屆行政委員會成員。雖然立法會議員「長毛」梁國雄繼續連任主席冇乜特別，而副主席仲係由吳文遠擔任，不過因擲嘢成名嘅黃浩銘同陳德章就分別獲委任為內務副主席同秘書長，莫非暗示社民連未來會愈行愈激？
「掟飯男」黃浩銘上位，意味社民連比前更激？
黃浩銘喺兩年前向「貪曾」掟粟米斑塊飯，諷刺高官不知民間疾苦，一掟成名，被冠以「掟飯男」稱號。舊年四月喺立法會審議財政預算案拉布期間佢玩升降機，被歷史性首次引用《立法會（權力及特權）條例》內嘅干預議員罪起訴，被判罰款一千五百元。而陳德章就喺施政報告諮詢論壇上，企圖向特首梁振英掟生雞蛋同路福西狼公仔，不過就誤中副車，搞到鬍鬚曾「中蛋」，被警方以普通襲擊及擾亂公眾秩序罪名拘捕。吳文遠話黃浩銘同陳德章係黨內年輕一代，相信有助長遠發展，但長毛一旦辭去立會職務後由邊個頂上？佢就話黨內未討論過喎！
