政壇：金刀梁為標準工時出鏡
標準工時制度究竟幾時先實施？相信唔少打工仔都好關注。標準工時委員會主席「金刀梁」梁智鴻早前出席仁濟醫院新春團拜時話，唔少人混淆標準工時同最高工時兩個概念，當務之急係向公眾推廣，佢仲自爆會粉墨登場拍宣傳片添！
梁智鴻（左）同李宗德（右）咬耳仔，唔知傾緊乜嘢密偈呢？
金刀梁唔係第一次做廣告明星，佢笑笑口話：「唔係，以前都拍過起錨（騷）。」四年前政府為咗硬銷政制方案而搞咗場起錨騷，時任行政會議成員嘅金刀梁夥拍同僚胡紅玉等人拍咗段宣傳片，雖然條片令幾位男女主角知名度大增，但起錨騷惡評如潮，結果都係拖累形象，得不償失。係起錨騷之前，金刀梁都拍過醫療融資改革宣傳片，都係一鍋冇米粥。
同場仲有公民教育委員會主席李宗德，佢講起本港少數激進人士針對內地客嘅衝突時好感慨，認為香港應該反思。講講吓，佢一見金刀梁就上前握手密斟，表情好肉緊。唔知係咪打算搵金刀梁幫手拍宣傳片，化解糾結日深嘅中港矛盾呢？
