政壇：曾德成卸走冬奧風波
「速滑小子」呂品韜早前喺索契冬奧時，提出有關香港代表團冇隨團隊醫嘅指控鬧得風風火火。民政事務局局長曾德成尋日發表網誌，提及到近日備受關注嘅體育賽事，只係提及索契冬奧臨近尾聲，完全無講到呂品韜事件。
設計圖片及對白
德成局長喺網誌一開波就話香港將會舉行好多國際賽事，仲講到好多香港運動員年內接連出征，只係輕輕講到索契冬奧。雖然佢冇直接提到呂品韜投訴冇隊醫隨團影響表現事件，但佢就話年輕人初接觸運動項目，係經過好多不斷練習同比試，所以佢哋嘅投入、付出同努力都係唔可以低估嘅。
自吹自擂晒功績
至於籌備同參與賽事嘅工作，佢話好多時係由民間嘅體育組織負責，政府只係擔當支持同配合角色，而根據《奧林匹克憲章》，政府更加係唔會干預屬於體育界自行決定嘅事務，佢仲講到明例如釐定選運動員嘅準則同出賽名單、出外比賽代表隊嘅名單及各項名額、甚至禮遇同交通配置等等，都係由主辦組織同相關體育國際總會決定，而部分賽事嘅安排就更加係屬於奧委會或者相關國際體育協會嘅權利添。佢又形容，見到咁多社會人士關注香港體育發展，係可喜嘅情況嚟喎！
講一大輪，總之就唔關佢事，擺明係唔想上身喇！但係跟住就自吹自擂，話局方為體育發展做咗好多嘢。
例如佢提到政府會監察公帑嘅有效運用，好似康文署咁，就喺一○年成立咗督導委員會，檢討現行資助制度和推出一連串措施，協助體育總會提升內部管制、企業管治同訂定工作表現目標，目前就有五十八個體育總會同二十六個體育團體透過其「體育資助計劃」獲得資助，可以用嚟支付職員、辦事處同體育活動開支等等喎。如果局方真係做得好嘅話，體壇就唔會出現咁多風波啦！
