城中鏡：陳爽記晒80間公司名

陳總話今年會係豐收年，佢哋過往投資嘅公司，有十二間排緊隊等上市，就算今年上唔切都可以遞交上市申請表，既有A股亦有H股。佢話公司嘅策略係「邊退邊買」，即係一面退出舊有項目，一面投啲新項目，投資咗八十幾間公司中，光控已退出咗二十幾間。

皆因落手落腳參與

何解會記得晒啲公司名？佢就笑笑口話都係因為早期公司團隊未夠成熟，自己參與喺當中，同團隊一齊落手落腳去睇點樣投資同埋搞好投資咗嘅業務，所以記得咁深。佢哋投資嘅公司絕大部分有好回報，佢嘅信念係「沒有差嘅行業，只有差嘅產品」，只要公司團隊質素好，就砌到好嘅產品，所以佢慶幸擁有高質素嘅團隊。

數數手指，陳總已効力光大十幾年，佢話十三年前嚟香港幫光大集團處理不良資產時，就同依家光大國際行政總裁陳小平合作，搞掂後兩個人就分別喺光控同光國做，佢話好佩服陳小平嘅能幹，仲希望陳小平年屆退休年齡後可繼續留任光國。