古物諮詢委員會喺前年通過將中環舊政府總部西座評為一級歷史建築，被稱為「政府山」嘅前中區政府合署中座、東座及西座，三幢大樓已一併移交律政司，打造香港法律地標，而律政司部分辦公室更有望趕及明年夏天前，率先進駐中座同東座。不過，原來「細屋搬大屋」依然有人唔歡喜。

設計圖片及對白

話明係一級歷史建築，政府山內部建築可改動嘅地方唔多，好似中座嘅行政會議廳及其連接正門大堂嘅大理石樓梯，就連樓梯對開嘅「扑咪」位都一律不得改裝，對於作為辦公室用途可謂「好睇唔好食」。據知律政司內部想倣效立法會會議廳外嘅歷史長廊咁，喺律政司照辦煮碗亦難以成事。

消息又指公眾監察政府對公帑嘅運用愈來愈嚴厲，律政司如果低價平租予飲食集團喺新總部內經營餐廳肯定招人話柄，加上為咗將呢塊原屬中環甲級寫字樓嘅地皮物盡其用，決定不設飯堂，預料律政司正式遷入政府山後，午飯人流勢必逼爆本來已插針唔入嘅中環。而隨着政府部門實施全面禁煙，唔少煙民職員煙癮起，分分鐘要走出中座閘外先可以「抖抖氣」，食支煙都要競步來回先趕得切返上樓做嘢。

唔單止咁，以往喺金鐘道政府合署，律政司律師要到高等法院出庭，只係落樓行過隔籬就到，但搬入政府山後就肯定再冇呢支歌仔唱。據知內部有人對此有微言，要求律政司安排穿梭巴士往返高院，甚至要挾辭職賴死唔搬。律政司未入伙，同事已怨聲載道，唔知律政司今次點收科呢？

第一手消息請下載on.cc東網iPhone/iPad/Android/Windows Phone Apps