政府早前公布新聞處處長黃偉綸將喺下周四調任海事處處長，接替即將退休嘅廖漢波。一班特首辦同事前晚就喺快活谷馬場搞自助餐同佢farewell，由特首梁振英自掏腰包請客，同場有政府新聞統籌專員馮煒光、特首辦主任邱騰華，黃偉綸嘅繼任人、現任政務司司長辦公室專員嘅聶德權均有出席，特首夫人梁唐青儀仲喺第二個活動完結後趕到，誠意十足。

黃偉綸（右）同聶德權好好傾。

問黃偉綸下星期四就調職會唔會太急呢？佢就話唔覺，因為一般政務官嘅正常內部調職都係大約一個星期前通知，屬於常規動作。佢又話喺分工方面會盡力而為咁話。不過，近年海事處風波不絕，處長一職真係三煞位，佢開心食完呢餐後，過到去海事處真係唔知是福是禍喇！

第一手消息請下載on.cc東網iPhone/iPad/Android/Windows Phone Apps