政府加大力度推動消滅廚餘工作，環境局局長黃錦星尋日宣布大計，目標係二○二二年減少四成廚餘，並發表「香港廚餘及園林廢物計劃二○一四至二○二二」報告，其他問責官員亦要幫手喺報告中撰寫獻辭支持。不過，財經事務及庫務局局長陳家強就疑似搞錯廚餘數字，認真老貓燒鬚。

陳家強喺獻辭中話，香港呢個繁忙城市，每日產生九千噸都市固體廢物，其中廚餘約佔四成共三千九百噸，相當於二百五十架雙層巴士重量，以此呼籲大家齊響應減少廚餘。不過，有心水清人士發現，陳家強嘅廚餘數字同環境局提供嘅資料有出入，環境局指港人每日共丟棄約三千六百噸廚餘，換言之佢講多咗三百噸廚餘。

話時話，陳家強做得財經事務工作，理應對數字極之敏感，今次疑搞錯廚餘數字，究竟係佢未卜先知未來嘅廚餘數字抑或純屬手民之誤呢？

第一手消息請下載on.cc東網iPhone/iPad/Android/Windows Phone Apps